Badator EUSKARALDIA! Donostiako eskoletan ere bat egin dezagun!

Azaroaren 23tik abenduaren 3ra egingo dugun ariketa kolektiboaren bidez euskararen erabilera areagotuko dugu, benetako presentzia izan dezan eskola bizitzan ez ezik, hortik kanpoko eguneroko jardueretan ere.

Erabiltzeko abaguneak eskolan normaltasunean sortu eta garatzen baditugu ere, komunitateko ahalik eta kide gehienek, gurasoak barne, eskolaz kanpoko eremuetan erabil dezagun bultzatzen saiatuko gara.

20. Korrikan lekuko-eramale izan gara

BAT-ZUK leloan sinetsita, denon mundu honetan, kriseilu koloretsu honen baitan  biltzen den gure Euskara bultzatzera atera gara korrika 1260. kilometroan, Donostian, alaitasun eta ilusioz, zirrarak jota, gure txikitasunean proiektu erraldoi horren parte garela sentituta.

Txomin Enean elkartu gara kuadrilatxoa, gure talde sendoaren izenean. Lekukoa 3 partaideren artean zeramatela, elkarren indarrak bilduta, burutu dugu zegokigun kilometro zatia.

Bat egiten dugu antolatzaileek jai-ekimen honen aurkezpenean adierazitakoarekin: Nik, hik,  hark. Guk, zuk, zuek, haiek. Bat eta batzuk: nire hizkuntza, zure hizkuntza;  gure kultura, gure kulturak; mundu hau, mundu hauek.

Hizkuntza baten alde egitea, finean, guztien alde egitea da. Baten eta batzuen munduaren alde.  Kultura unibertsalaren alde.

Horregatik, elkar aberasten dugula, jendartearen partaide oro aniztasunean bidaide, gure ekarpentxoa sustatu dugu:  Euskara arretaz zainduz, gure nahia eta denon egitekoa da euskara aukera-berdintasunean bizitzea egunero eta eremu guztietan. Herritar guztiok bizi behar dugulako aukera-berdintasunean egunero eta plaza guztietan.

 Hala bedi!

Korrika 20

KORRIKA 20! ----- Z I R K O R R I K A

Dakizuenez, apirilaren 30ean 20. Korrika izango dugu Euskal Herriko herrietatik barrena. Ikastetxeetan ere KORRIKArekin bat egiten da. Ikasleen artean dugun aniztasunari erantzuteko ahaleginean, zuekin partekatu nahi dugu KORRIKA 20, aurtengo abestiaren moldaketa hau.
Ikasle guztiek abestia uler dezaten eta ulertzearekin gozatu eta parte hartu!

Moldaketa: Bego Garaik egina.  

Gehiago jakin nahi?
http://www.korrika.eus/

Unitate didaktikoak:
http://www.korrika.eus/unitate-didaktikoa/ikastetxeetakomateriala.html

Korrika 20 - piktogramekin
https://youtu.be/SJ5MC-oIW0Y

Eskola Hiztun Bila XX normalkuntzaren eskutik

2016-17 ikasturteko Eskola Hiztun Bila  Jardunaldiaren XX. edizioa  ospatu berri da urriaren 25 eta 26an Leioan (EHUko Areto Nagusian). Aurtengo aztergaia "Euskara ardatz eta ikasle eleaniztunak helburu dituen ikastetxearen Hizkuntza Proiektua" izan da.

2 egunetan zehar  600 lagun inguruk jarraitu dituzte gure arteko eta kanpoko adituen esanak, Erkidegoko ikastetxeen proposamenak eta Normalkuntza Taldetik egindako ekarpenak.

Batetik, honako hauek izan dira hizlariak eta garatu dituzten ideiak:

-          Ines García eta Leire Díez de Gereñu (EHU): Euskara ardatz eta ikasle eleaniztunak helburu dituen eskolaren ezaugarriak, betekizunak eta erronkak.

-          Vicent Pascual Granell (Institut d’ Estudis Catalans, IEC):Hizkuntzen Trataera Integratua (bateratua eta dibertsifikatua) IHiPn,bateti, eta bestetik Hizkuntzen Trataera Integrala (arloetako edukien eta hizkuntza alderdien programazio bateratua)  IHiPn.

-          Uri Ruiz Bikandi (EHU): Ikasgelan nola egin lan euskara H2 duten ikasleek euskarazko gaitasun egokia gara dezaten?

Ideiok errealitatean nola gauzatzen diren erakusteko, eskolako eragileek ekarpenak egin zituzten beren praktikak azalduz:

-          San Martin Agirre LHI (Bergara): Hizkuntzen Tratamendu Integratua garatzeko modu bat.

-          Koldo Mitxelena LHI (Errenteria): Ikastetxeren IHiPa, egindako ibilbidea eta hartutako zenbait erabaki esanguratsu.

Amaitzeko, Hizkuntza normalkuntzako aholkularien IkasPro lantaldearen ekarpena plazaratu zen IHiPari begira proposamenak eta iradokizunak HNren ikuspegitik lana eskainita.

           

Jardunaldia amaitu bada ere, bertan landutako gaietan sakontzeko aukera izango da azaro eta abenduko Normalkuntzako mintegi-bileretan (Oiartzun-Irun eta Donostiako elkarlaneko lan-saioetan).

Eskola Hiztun Bila XXri buruzko informazioa luze-zabal kontsultatu ahal izateko espresuki sortutako sites honetan aurki daiteke materiala: https://sites.google.com/site/eskolahiztunbila201617/ edo https://goo.gl/cVnrxK

Hizkuntza Proiektua egiteko Mintegiaren 1. saioa

Azken aldi honetan hezkuntza eremuan diren zenbait erakundetik (E.J.) Hizkuntza Proiektu bat garatu behar dela esaten da. Egia da garai honetan hizkuntzek beste protagonismo bat dutela eta euren aprendizaia gero eta beharrezkoagoa suertatzen ari dela. Hizkuntzak ikasi eta menperatzean, komunikazioa, bizitzaren errepresentazioa eta ikasteko prozesuak dira nahitaezko alorrak hiztunek aurrera egin dezaten era arrakastatsu batean.

Beraz Donostiako Berritzegunean (G01) bestelako eskaera kontuan hartzeaz gain aurrekoa abiapuntu bihurtzen da. Asmo orokor horrekin antolatzen dugu “euskara ardatz eta ikasle eleaniztunak helburu dituen Hizkuntza Proiektuari buruzko” Mintegia. Bataz beste Hizkuntza Proiektuaren sentsibilizazio fasean (ikusi diapositiba) ondo adierazten dira gizartean gertatu zaizkigun aldaketak eta aldi berean Hizkuntza Proiektuaren beraren zentzua.

Lehenengo saioa burutua (urriak 11), beste sei gelditzen dira asmoak errealitate bihurtzen joateko.

Hizkuntza Proiektua lantzeko Mintegiaren 6. Saioa

 Joan den asteartean (apirilak 19) egindako saioan Ikastetxeko Hizkuntza Proiektua aurrera eramateko ibilbidearen beste atal batzuk jorratu ziren.

Bata Diagnostiko Fasearena zen. Aurreko saioan aztertua bazen ere honetan Ebaluazio Diagnostikoak ematen duen informazioarekin zer egin edo nola planteatu gai hau aritu ginen aurreko saioan adierazitako taula bat bete eginez. Dudarik gabe parte hartzen duten ikastetxeen komentario nahiz ekarpen onuragarriez baliaturik egin ahal izan zen.

Beste atal bat azkeneko honetatik eratortzen da: Garapen faseari hasiera ematen zaionean zer alderdi hartu kontuan, zer tresna eta zertarako, jakina adibide batzuk zein gogoetarako ideien laguntzaz.

Gainerakoan iturri ezberdinetako txostenak nahiz informazioak erabili ziren.

Ondorioa: Eleaniztasunerantz bidean Diagnostiko fasea garrantzitsua bada Garapenarena beste hainbeste edo gehiago dela esan liteke, noski Ikastetxeko benetako beharrizanei heltzeko aspektu ezberdinak era egoki batean zorroztu badira.

Hizkuntza Proiektua lantzeko Mintegiaren 4. saioa

Nahi izanez gero saio honen abiapuntua "eleaniztasun" kontzeptua sakontzea izan da. 

Izan ere Mintegiko aplikazio digitalean (Moodle) eskegita daukagun "Europako Erreferentzi Markoa", dokumentu honek dituen alderdi ugari nahiz anitzen artean, ongi adierazten digu termino horren esanahia. Honetan datza orain arte izan den eredutik atereaz hizkuntzak ikasteko zein irakasteko eredu berria. Hain zuzen ere gako honetatik hizkuntzen antolamendurako zein ikasleen ikaskuntza-irakaskuntza prozesuetarako aspektu berri batzuk (komunikazio ikuspegia, trataera bateratua,...) eratortzen dira.

Mintegiko saioan ere Hizkuntza Proiektua egiteko behin betiko Gida plazaratu genuen, baita honek dituen atalak komentatu nahiz xehetasun batzuk egin genituen ere.

Atal garrantzitsu bat ikastetxeen ekarpenena da; egun honetan zenbait ikastexek beraien Hizkuntza Proiektuen kronograma -eta aurkibideak- nahiz sarreretaz ekoiztutakoaz elkarrizketatu ahal izan genuen. Beste kasu batzuetan atal horiek baino gehiago aurkeztu zituzten.

Diagnostiko fasea (gehienbat hizkuntzen ikas-irakaskuntzari buruzko datuak) datorren aztergaia izango dugu hurrengo saiorako.

Hasierako "eleaniztasun" gaiari helduta, Gidan ere modu xume batean "eleaniztasunaz" hitz egiten da. Hona hemen hau tratatzeko Gidatik ateratako tresna bat.  

Euskararen Nazioarteko Eguna berritzegunean

“Gure hitzak, esan berriz esan, ez daitezela ahaztu, ez daitezela gal” Mikel Laboaren ahots hunkiberaz, eta Bernardo Atxagaren  “Hitzak ez du antzik jaboiarekin” testua irakurriz eman genion hasiera Berritzegunean Euskararen Nazioarteko Egunaren ospakizunari. 

“Euskara aurrera aterako al den galdetzen didazu. Erabiliz gero aterako da; bestela ez” dio Atxagak bere testuan, eta Berritzeguneko kideok hausnarketari heldu genion hurrena Mintzodromo txikian: Gure partetik kalitatea, eta erabilpena sustatzen saiatuko garela garbi geratzearekin batera, langintza horretan elkarri laguntzeko prestutasuna agertu zen osatu ziren hiru taldeetan.

Segidan,  Instituzioek apailatutako leloarekin oso bat gatozenez, “Eskerrik asko, euskararen taupada izateagatik”  zintzoki adierazi genien gure arteko Euskaldun Berriei, erdia baino gehiago direnei, beraien ahaleginari esker ere Donostiako Berritzegunea euskaldunagoa delako.

Eta azkenik, behin lehiaketatxoaren saria Carmen-ek eskuratuta, umorea eta lana elkarren eskutik doazela erakutsiz eta biziz, gustura asko kantatu genuen G. Arestiren “Guretzat” poema, Oskorrik musikatu eta Arantza San Sebastianek moldatutako bertsioan honela dioena “Har ditzagun eskuan… ildo ta programak… berrikuntzaz janzteko… BGko zelaia”. Ondoren, kantu saioak mokadutxoarekin jarritu zuen…

Hizkuntza Proiektuari heltzen

Lehengo egunean (abenduak 1) Hizkuntza Proiektuaren Mintegiaren 3. saioari heldu genionez bertan ikututako atal bat dela eta, alegia, Hizkuntzaren lan taldearena, zenbait aburu plazaratu ditugu hemen.

• ·         Hizkuntzaren lan taldea edo batzordeak  ikastetxean hizkuntzekiko organo bultzatzaile izateko ezinbesteko garrantzia du;  batez ere ikastetxeko beste organoetan sare prozesuaren antzeko ibilbidea eginez eragina badu.

• ·         Beste batzordeek hizkuntzei buruz egin dezaketen lana ere inportantea da. Zenbait kasutan Pedagogia Batzordearen barruan hizkuntzei buruz egiten den jarraipenak Hizkuntzaren lan taldea edo Hizkuntzaren batzordearen funtzioa ordezkatzen du; beraz, zenbait unetan,  Pedagogia Batzordeak bat egiten du Hizkuntza Batzordearekin.

• ·         Hizkuntzaren lan taldea edo batzorde naturalaren osaketa hizkuntz ordezkariekin osatutakoa litzateke gehi koordinatzaileren bat (zuzendaritzaren kide bat, beste bat,…)

• ·         Holako taldearen osaketaz gain partaide bakoitzak dituen zereginak garrantzitsuak dira, bataz beste jakitea bakoitzak zer egin behar duen.

Hizkuntzaren lan taldearen partaideak nahiz eginbeharrak

• ·         Honek eramaten gaitu Kronograma kontzeptura edo Plangintza terminora. Gehienbat, ikasturtearen bukaeran hizkuntzei buruzko plangintza bat egitea (gaiak-ekintzak, arduradunak, denborak,…) nahitaezko ataza bat izan beharko litzateke.

•  ·         Funtzionaltasuna bermatzeko azpitaldeak gerta daitezke.

• ·         Ahal bada elkarjartze batean hartzen diren erabakietatik eurak idaztera dagoen distantzia ahalik eta gehien murriztea.

• ·         Hizkuntza Proiektu baten testuinguruan, eta ikastetxeko hizkuntzen helburuei begira, etorri berrien kudeaketa begi-bistakoa da.

Hizkuntza Proiektua lantzeko Mintegiaren berri

Goikoan azaltzen den irudia Hizkuntza Proiektua lantzeko Mintegiko aplikazio digitalekoa da. Bertan saioz saioko edukiak azaleratzen ditugu.

Orain arte bi saio besterik ez ditugu egin –datorrena abenduaren hasieran-. Besteak beste saioen helburu garrantzitsu bat parte hartzen diren ikastetxeen artean era egoki batean bat etortzea litzateke; horrela aurrerantzean ibilbide komuna garatuko da. Oro har, bi saio hauetan adierazitako lanak nahiz azpitaldeen elkarerraginak honako hauek izan dira:

• Ezagutu hizkuntzei dagozkien deialdiak, iradokizunak, dokumentazioa.

• Begiztatu nahiz komentatu beste ikastetxeetan sortutako praktika onen  markoak.

• Ezagutu Hizkuntza Proiektuaz sortuak diren beste plataforma digital batzuk.

• Hurbildu Mintegiko parte hartzaileek beren ikastetxeetatik ekartzen dituzten ekarpenetara.

• Ezagutu galderak, hausnarketak, aukerak, alde batetik, hizkuntzei buruzko diagnosia egiteko, eta bestetik, hizkuntza proiektu bat idazten hasteko.

• Eduki edozein ikastetxetan hizkuntzen esparruaz sentsibilizatzeko hasierako iradokizun batzuk.

• Proposatu ikastetxean hizkuntzen ardura nahiz kudeaketa dauzkan lan talde (edo hizkuntza batzordea)-aren partaide ezberdin zein bakoitzaren betebeharrak.

• Jarraitu hizkuntza proiektu bat egiteko gida ofizialaren argitaratzearen prozesuari.

Beheko parte honetan ikus daitekeen bideoak "zer da hizkuntza ongi hitz egitea" delako galdera medio ongi adierazten dizkigu hizkuntzak (hizkuntzek) dituen erronkak eta aldi berean Hizkuntza Proiektu batek dituenak ere bai.

Tribuaren berbak saioan eskoletan euskararen erabilera aztergai

Maiatzak 18an ETB1eko Tribuaren berbak saioan Kike Amonarriz Eskolan erabilera sustatu gaiaren inguruan aritu zen. Gaia eremu ezberdinetatik aztertua izan zen eta horretarako elkarrizketa ezberdinak egin ziren.

Euskararen Normalkuntza bidean datu ezberdinak eskaintzeaz gain, hausnarketarako ildo esanguratsuak aztertu ziren. Finean, elkarrizketatuak izan ziren pertsonek beraien ekarpenak eskaini zituzten egungo errealitatearen analisia eginaz; esate baterako, Soziolinguistika Klusterreko Pablo Suberdiolak Arrue ikerketaren emaitzen azterketa egin zuen, Iñaki Biain Irungo Berritzeguneko HNTak aisialdi eskaintza eta hedabideen eraginez hitz egin zuen, Jasone Aldekoak Ulibarri Programaren nondik norakoa azaldu zuen eta ikastetxe ezberdinetako ikasle eta irakasleek beraien esperientzia eta ekarpenak egin zituzten.

Tribuaren berbak Eskolan erabilera sustatu saioan adierazitakoa link honetan eskuratu dezakezue.

http://www.eitb.eus/eu/telebista/programak/tribuaren-berbak/