KORRIKA 21

GAUR DONOSTIAtik igaroko da. 

Donostiako ikasleak ere klika egiteko prest abiatuko dira.

KLIKA KORRIKA 2019-kanta

Mad Muasel:

Heldu da guztion andereñoa

adi, adi, pasatuko dut zerrenda

je suis Mad Mua Sel ohlala!

Faty faty den soinua zabaltzen dut mundura

Guztiok bat egitea ezinbestekoa

bakoitzaren nortasuna errespetatzea

motorrak arrankatzeko momentuko aukera

gurea, herrikoa, KO RRI KA

Tipi tapa tipi tapa lortzen merezi duguna

martxan jartzen hasteko eginzazu KLIKA

ez dugu presarik helburua argi dago eta.

Pausuz pausu, gure erritmora!

Gure erritmora

nire, zure, gure erritmora

Hey Fermin, nola da?

GURE ERRITMORA

KLIKA KORRIKA KLIKA

GURE ERRITMORA

KLIKA KORRIKA KLIKA

KORRIKA!

Jai giroa, bero beroa

Orain oraingoa gero gerokoa

Oreka ez galtzeko oinarri sendoa

Hauxe da gure leloa:

PO-PO- PO- SIBLEA DA KLIKA ALDATZEA

elkarren artean konektatzea

Pra- pra- praktikatzea

euskara gure artean bizitzea

Lan ta lan, banaka, taldean 

Aukeratu zure lekua bidean

Herriaren arnasa sentitzen da 

Korrika datorrenean

Zu gabe, zu gabe, hau ez da posible

orain gaur eta hemen dena da POSIBLE

Gure erritmora

nire, zure, gure erritmora

KLIKA KORRIKA KLIKA

GURE ERRITMORA

KLIKA KORRIKA KLIKA

Fermin:

Klika, klika!

Altxa ezkerreko besoa

klika klika!

Orain altxa eskubikoa
Klika, klika!
Antenak ditugu piztuta
Klika, klika!
Gure sarea doa korrika

Klika, klika!

Euskal planeta ari da dantzan

Klika, klika!

Betikoak ari dira guri sermoika

Klika, klika!

Euskaraz egingo diet zirika

Klika, klika!

Ikimilikiliklik…a!!!

La Furia:

Suaren erritmora, hitzari bide eman

arbasoen dantzak, kulturaren gorputzean

Kantauriko brisa, Barde(a)tako ziertzoa

Gure Borrokan tinko jarraitzeko hauspoa

Pista argituko duen metxa piztu dadila

Herri feminista eta askearen alde Klika

Lekukoa neskatxari emango dioten,

Amamek ahotsa altxatu dezatela ozen,

Aterpea sentitzeko,

komunikatzen den herri bat ez da inoiz

zatituko.

Erriberatik la Furia banator korrika

Batu gaitezen guztiok arma tiro Klika!

Gure erritmora

Nire, zure, gure erritmora

KLIKA KORRIKA KLIKA

GURE ERRITMORA

KLIKA KORRIKA KLIKA

KORRIKA! 

 

Martxoak 8, Emakumeen Nazioarteko Eguna

Martxoaren 8an Emakumeen Nazioarteko Eguna ospatzen da mundu zabalean. Ospakizun horrek beharrezkoa izaten jarraitzen du, arreta jarri beharra baitago egun ere emakumeek, egunero eta bizitza osoan zehar, jasaten dituzten desoreken inguruan, zergatik eta emakumeak direlako.

Beharrezkoa ospakizun bat, orobat, denok sentsibilizatu gaitezen desberdintasun horrek urratzen dituen eskubideen inguruan, ezkutatzen duenaren inguruan, eta, batez ere, denok eraldaketari bidea eman diezaiogun gizonok eta emakumeok aukera, eskubide eta betekizun berak izan ditzagun.

Hemen, Emakundek egindako materiala

VII Jardunaldi pedagogikoa Kale Dor Kayiko: Eskola-absentismoa gainditzeko gakoak

Azaroaren 28an Kale dor Kayikók antolaturiko VII Jardunaldi Pedagogikoa ospatu genuen Donostiako Berritzegunean, aurtengo leloa Eskola- absentismoa gainditzeko gakoak delarik.

Marko legalaren aurkezpenarekin hasi ginen: Hezkuntzaren derrigortasuna, hezkuntza eskubide unibertsala bezala eta hortik Pedro Carnicero ikuskariak Eskola-Absentismoaren aurka aritzeko erakunde desberdinetatik garatzen diren prozesuetaz hitzegin zuen.

Donostiako Berritzegunearen izenean Lui García Gurrutxaga aritu zen gero.

Gure berritzeguneak aurkeztutako gaia Eskola Arrakasta guztiontzat izan zen, ekitatea bermatzeko eta inklusioarako dauden oztopoak gainditzeko gakoak edo giltzarriak.

Bilboko Pio Baroja ikastetxeak aurkeztu zigun esperientzia inspiratzailea izan zen, Ikasketa Buruak mezu oso positiboa luzatu zigun: ikasleengan itxaropen altuak izan behar ditugula, familiak gureganatu behar ditugula, ditugun baliabideak era eraginkorrean erabili behar ditugula eta batez ere jarrera derrotistek porrota sortarazten dituztela.

Kale dor Kayikoko hezitzailea den Ainara Pinak ere familiekin lana egiteko , berdinen arteko elkarekintzan abiapuntutzat harturik, ideiak ere eman zizkigun

Bukatzeko ikasleen eta familien bizipenak ere bideo baten bidez entzuteko aukera izan genuen.

Bukatzeko gure Donostiako Berritzegunearentzat hezkuntza eragile desberdinekin: elkarte, ikasle, familia, irakasle, beste erakundeekin elkarlanean jardutea helburu estreategikoa dela esan beharra dago.

Beraz denoi zorionak!!  

Datorren azaroaren 25ean Emakumeen kontrako indarkeriaren aurkako eguna ospatzen da

Azaroaren 25a, Emakumeen kontrako indarkeriaren aurkako Nazioarteko Eguna badatorrela eta, hemen duzue emakumeen kontrako indarkeriaren aurkako sinboloa deskargatzeko aukera, puntu lila (sakatu hemen irudia deskargatzeko). Sinbolo hau publikoki erakusteak berarekin dakar emakume eta gizonen arteko berdintasun eza oinarri duen era honetako indarkeriaren kontrako konpromiso aktiboa. Hilabete honetan zehar honen erabilera egin dezazuen eskatzen dizuegu, irudi hau publikoa egitea zuen mezuetan, zuen webguneetan, sare sozialetan, egoitzetan, eskutitzetan, eta bururatzen zaizuen leku guztietan.

                                                  

Con motivo del próximo 25 de noviembre, Día Internacional contra la Violencia hacia las Mujeres, ponemos a vuestra diposición la imagen del punto lila, símbolo del rechazo a la violencia contra las mujeres (podéis descargar la imagen aquí). Mostrar este símbolo públicamente implica un compromiso activo contra este tipo de violencia cuyo origen se encuentra en la desigualdad entre mujeres y hombres. Os pedimos que durante este mes hagáis uso del punto lila, mostrándolo, por ejemplo, en los pies de firma de vuestros correos, en vuestras cartas, en vuestras instalaciones, en vuestra web, en las redes sociales y en los lugares que consideréis oportuno.  

IKASTETXEETAN IKASLE, IRAKASLE ETA FAMILIEKIN LANTZEKO PROPOSAMENAK

BIOLENTZIA NON KOMUNITATEA HAN

LA COMUNIDAD CONTRA LA VIOLENCIA

Egun bakar bat urte osoan?

Ilobaren galderari erantzun nion:
-Bai, maitea, emakumearen eguna delako.
Eta berak:
-Egun bakar bat urte osoan?

Nebari emakumearen eguneko kantua kantatu nion:
-"Zutik emakumeak / hautsi gure kateak / Zutik zutik zutik"
Eta berak:
-Baina zuk ez dituzu kateak jarrita!

-Zatoz nirekin martxoak 8-ko manifara- Esan nion lagunari.
-Ni ez naiz joango -erantzun zidan- manifestazio horretako erdiak baino berdintasun handiagoz jokatzen dut egunero.

Berdintasun ezaren maila asko daude, jakina. Batzuetan, matxismoa nabarmen azaltzen da guztion begien aurrean, emakumeen aurkako biolentzian esate baterako, edo -hain egoera latzetara joan gabe- etxeko lanetan edo familiaren zaintzan, emakumeak zama guztia jasaten duenean. Bestetan, parekotasuna betetzen ez den kasuetan, erraz identifikatzen ditugu eredu desegokiak, baina badira hain identifikagarri ez diren joera asko. Emakundek berak ere gogorarazi dizkigu "alertarako seinaleak": krisi ekonomikoak emakumeengan izan duen eragina; gazte harremanetan indarra hartuz doazen kontrol jarrerak; Abortuaren Legea aldatzeko mugimenduak; berdintasunean aurrera joan ahala gizarteko hainbat sektoretan azaltzen diren erreakzioak, emakumeen aurkako indarkeria "hutsalkeriaz" tratatzeko jokabideak…neskatilen sexualizazio gero eta handiagoa eta goiztiarragoa publizitatean eta komunikabideetan.

Egoerak era askotakoak dira. Eta horren kontzientea gara. Baina kateak esku muturretan bistan ez ditugunok ere, ondokoen eskumuturretako kateek lotzen gaituzte.
"bat iñon loturik deino
ez gara libre izango"
Eta ez bakarrik andrazkoak, baita gizonezkoak ere. Besteek pairatzen dutena, geu ere ukitzen gaituelako ezinbestean.

Izan ere, kateak ez dituzte jartzen soilik gizonezkoek, baizik eta eredu patriarkalean eroso sentitzen diren guztiek, izan gizon, izan emakume! Horregatik hezkuntzan bereziki ahalegindu behar gara askorentzat ikusezina den hori agerian jartzen. Sentsibilitate fina garatu behar dugu irakasleok: hasi salagarriak diren egoerak ikasleen bistara ekartzen, segi eredu berdinzaleak garatzen, eta buka hizkuntzaren erabileran ezkutatuta gelditzen diren sexismo eta androzentrismoaren moldeak aldatzen. Horretarako, eskoletan erabili daitezkeen hainbat baliabide aurkeztu ziren gure blogean otsailean, eta gaur, orientasare wikian irakasleen artean partekatuz egin duten bilduma interesgarri hau ekartzen dizuegu.

Eta hor segituko dugu, tarra-tarra, badakigulako besteek baino urrats gehiago eman duenak ere ez duela lana amaitu.
"bat iñon loturik deino
ez gara libre izango.
Batek gose diraueino
ez gara gu asetuko"

Martxoak 8 egunez egun

Orain arte egindakoa asko bada ere, berdintasuna guztiz errealitatea bihurtzeko asko falta da; horixe gogoratzeko, munduan, egun aldarrikatzaile bat dugu: Martxoak 8a.

Martxoak 8 from anaextramiana

Ikastetxeetan ere, egun aldarrikatzailea izatea nahi dugu: gure ikasleek testuinguru guztietan desberdintasuna ikas dezaketen moduan, aukera izan behar dute berdintasuna eta berdintasunean ikasteko.
 

Asmo honekin, ikaste testuinguru horietatik aurten lan egiteko bat aukeratu dugu, ikus-entzunezkoa, eta ikusentzunezko mezuen gaineko ekintza batzuk garatzea proposatzen dizuegu.

Baita azpimarratu nahi genuke Martxoaren 8 inguruko egunetan lan egiteaz gain, ikasturtean zehar ere aintzakotzat hartzen dugula beste iragarkiak, abestiak, filmeak… kritikoki aztertzea eta erantzun aktiboak sustatzea.

Materiala eskuratzeko klikatu hemen

Hezkidetza/ Azaroaren 25a, Emakumeenganako indarkeriaren aurkako Nazioarteko Eguna

Añadir leyenda

Azaroak 25aren inguruan ikastetxean egiteko planteatzen diren ekintzak: irakasleekin, ikasleekin eta familiekin

 Emakunde - Emakumeen aurkako indarkeria 

Ekainak 28: LGTTIB Harrotasun eguna

Libre naiz! Libre izan beharko ginake guztiok! Baina denok jakin badakigu ez dela hau gertatzen leku guztietan. Izan ere munduko 7 herrialdeek, homosexualitatea heriotz-zigorrarekin zigortzen da eta beste 79 herrialde gehiagotan ilegaltzat jotzen da.

Larunbat honetan LGTBI kolektiboaren Nazioarteko harrotasun eguna ospatzen da. Aldarrikapenerako jai hau ekainaren 28an ospatzen da, 1969.urteko egun horretan 
“Stonewalleneko istiluak”gogoarazteko (New York, AEB). Polizia talde bat orduan hain 
gutxi zeuden taberna gay batera sartu zen, bat-batean. Edari alkoholdunen kontrola egiteko aitzakiarekin sartu ziren poliziak, baina bisitaren helburua askoz haratago zihoan: poliziak bezeroak iraindu eta eraso egin zieten. Honen ondorioz, kalea hartu zuten euren eskubideak aldarrikatzeko. Izanere,gertaera haiek ASKAPEN HOMOSEXUALERAKO MUGIMENDUAren hasiera ezarri zuten.  

LGTBI kolektiboek honakoa aldarrikatzen dute urte guztian zehar eta bereziki ekainak 28an:

• Pertsonen duintasuna eta osotasun fisikoa, -estatuetako gobernuen legeen bidez bermatu beharrekoak biak- errespetatzea. 
• Herritar guztiak errespetatzea, haien orientazio sexuala edozein dela ere.
• Lanerako eskubidea bermatzea, sexuaren ondoriozko inolako diskriminaziorik gabe.
• Espazio publikoan egindako adierazpen afektiboen ikusgarritasun publiko-soziala errespetatzea.
• Sexualitate anitzerako bidea egitea, mitorik gabe, konparaziorik gabe, inposiziorik gabe eta sexualitate askearen –aukera eta orientazio sexualerako askatasuna barne- aurkako jokabide guztien kontra gaude.

Beraz, aldarrikatu dezagun egunero pertsona guztien eskubideak! Mundu anitz batetik errealitate anitz batera!

Maiatzaren 17ko eguna: LGTTBfobia kontrako eguna

MAIATZAK 17ko eguna: LGTTBfobia kontrako eguna

Gertaerei izena ipintzen diogunean agerikoak, begi-bistakoak, nabariak bihurtzen ditugu.  Horregatik, larunbat honetan Maiatzaren 17an, Lesbofobia, Homofobia, Bifobia eta transfobiaren kontrako nazioarteko eguna dela gogorarazi nahi dizuegu.  Egun horretan duela 14 urte, Osasunaren Munduko Erakundeak (OMEk) gaixotasunen zerrendatik kendu zuelako izendatu zen hain zuzen ere egun hau berezia egutegietan. Hamarkada bat baino gehiago igaro da eta oraindik egun hau “ospatzekoa” denik ezin dugu esan.

        

         Izan ere, ISEI-IVEIk (Irakas Sistema ebaluatu eta Ikertzeko Erakundeak) 2012. urtean egindako ikerketan, lehenengo aldiz, ikasleei ea ikaskide bat bere sexu- orientazioagatik, gay edo lesbiana izatea, edo neska edo mutila izateagatik etengabe baztertzen zuteneko kasurik ea ikusi duten galdetzerakoan datuak adierazgarriak dira:

·        DBHko ikaslen artean, %23,6k dio ikaskide bat gay izateagatik baztertu dutela ikusi duela eta %7ak lesbiana izateagatik. DBHko %10ak baino gehiagok diote ikaskide bat, bere sexu- orientazio edo bere harreman afektibo eta sexualei buruzko esamesen bidez etengabe baztertu duteneko kasuak ikusi dituztela.

·        LHko ikasleak, hirugarren zikloan, %12k  gay izateagatik  eta %5a lesbiana izateagatik bazterkeria egoeren ikusle izan dira.

Bestetik hortxe daukagu, COGAM eta FELGTBek 2012ko abendutik 2013ko abendura  estatu mailako LGTB pertsonei eginiko ikerketen emaitzak:

·        Elkarrizketatuen artean %76ak ikastetxeetan beraien orientazio sexualagatik edota identitate sexualagatik baztertuak izan direla baieztatu dute.

·        %92.76k ikaskideengatik pairatutako bazterkeria izan dela onartu dute. Aipatutako horietatik %26.87ak berain irakasleengandik ere bazterkeria hori jasan dutela onartu dute.

          Datu hauen aurrean eta eguneratuagoak dauden ikerketek horixe diotelako, guk, irakasle bezala, erantzukizun bat dugu egoera hauen aurrean. Gure ikasleek ezin dutelako inongo arrazoiengatik bazterkeriarik jasan!

         Animatzen zaituztegu zuen ikastetxeetan gai hau lantzera. Horretarako, hemen doakizue atxikita Donostia, Lasarte eta Ordiziako Berritzeguneen artean  Hezkidetza mintegirako  prestatutako  material erabilgarria.

Iturriak:

ISEI-IVEI, (2012). Ikaskideen arteko tratu txarrak:  Lehen Hezkuntzan eta Derrigorrezko Bigarren Hezkuntzan. 2012 Txosten exekutiboa.

FELGTB eta COGAM. (2013). Estudio 2013 sobre discriminación por orientación sexual y/o identidad de género en España.

Hezkidetzaren bidea margotzen...

                                         

               

Aste honetan, larunbatean hain zuzen ere, martxoaren 8ko eguna ospatu edo aldarrikatuko dugu. Gure eskoletan, gure geletan, gure Elkarbizitza-Hezkidetza batzordean egun horri begira gaude. Hori dela eta aproposa iruditu zait aurten jaio berri den "Hezkidetza Mintegiaren" berri  ematea. 

        Dakizuenez 2013-2014 ikasturte hasiera Hezkuntza Sailatik "Hezkuntza-Sisteman hezkidetza eta genero-indarkeriaren prebentzioa lantzeko gida plana" aurkeztu zen. Aurkezpenaren ostean,  hain zuzen 2013ko azaroaren 5eko ebazpenean, Hezkuntzako sailburuordearena, zeinaren bidez Lehen Hezkuntzako eta Bigarren Hezkuntzako ikastetxe publikoei, hezkidetzari eta genero‐indarkeriaren prebentzioari heltzeko jarduketa‐proiektuak egiteko 2013‐2014, 2014‐2015 eta 2015‐2016 ikasturteetarako dei egin zitzaien. 

       Deialdiaren ostean, eta era zabal batean, Erkidegoko Berritzegune guztietan Hezkidetza Mintegietako "ateak" zabaldu genituen. Donostiako Berritzegunean ere. Esan beharra dago Donostiako Berritzeguneak, Ordizia eta Lasarteko Berritzeguneekin batera lan egiten ari garela Mintegi bakar bat osatuz. Egun ia 40 lagun (gizon zein emakume tartean) jantzi ditugu Betaurreko Moreak.  Hezkidetza plana eta haren zirriborroa garatzea, materialak partekatzea eta  beste hainbat gauzaz gain, hilean behineko azteazkena egun more bilakatu zaigu. Hiru ordutan, denok ikasten dugu, gure kezkak eta lorpenak konpartituz. 

     Ziur gaude, gaur Donostialdeko hainbat eskoletan Martxoaren 8ko eguna ospatzen ariko zaretela, New York-eko "Triangle" fabrika ekarriko duzue gogora; Marie Curieren bizitza eta lorpenak landuko dituzue; Maialen Lujanbio, Mailen Chourraut, Hedi Lamarr,  Edurne Pasaban, Toti Martinez de Lezea... bezalako izenak oiartzuna egingo dute gaur hormetan.

   Egun guztiak Martxoak 8a izan beharko luketelako, gure eskoletan berdintasuna magotzen ari garelako, eta hortan jarraitzeko asmoa dugulako... Jarrai dezagun lanean!

Jantzi ditzagun betaurreko moreak!

(Oharra: Erakutsiozue janzten oraindik soinean ez dituztenei!)