KONTSULTORE MINTEGIA 2018-2019

2018-2019 IKASTURTEA-KONTSULTORE MINTEGIA

GAIAK
- Ikasturte hasierako orientabideak: prozedurak, protokoloak, aplikazioa...
- Kontsultoreen esku-harmena HH eta LH etapetan; esperientzien trukatzea.
- Haur Hezkuntzatik Lehen Hezkuntzarako trantsizioa: gogoeta, proposamenak eta esperientziak
- Tutoretza plana: garapen pertsonala, harremanak, ikaskuntza prozesuak eta lanbide-orientazioa


ORDUTEGIA:
asteazkena, 9:00 - 11:00

EMAILEAK:

Arantza San Sebastian-Maxus Zaldua-Karmele Zubeldia




Izen emateko: http://berritzeguneak.net/eu/actividades_detalle.php





ARMIARMA SAREA--
-------------------------Gaurkoan, taldeko kide guztiak elkar ezagutu eta norberaren asmoak mintegiarekiko jasotzeko erabili dugun talde kohesiorako jolasa.

Golden 5: argia ikasgeletan

Ez da lehenengo aldia Golden 5 proiektuaren berri ematen dugula Donosgune blogean. Ikasturte honetan ere zabaldu genuen programaren oinarrizko informazioa sarrera honetan:
Golden 5: Gure ikasleek distira egin dezaten.
Bertan jaso dezakezue proiektuaren nondik norakoa eta, horregatik, oraingoan ez dugu azalduko. Gaurko nahia, ordea, zera da: azken ikasturtean zer jaso dugun eta epe laburrean zer aurreikusten dugun konpartitzea.

2016-17 ikasturtean, mintegi berezia eraman dugu aurrera, berezia formatuan eta edukian. Formatuari dagokionez, zortzi saio izan ditugu, bost Berritzegunean, Donostiako ikastetxeetako arduradunentzat, eta hiru EHUko egoitzetan, Maria Jose Lerak emanda, Gipuzkoa osoko ikastetxeetatik etorri diren irakasleentzat. Berezia ere, edukiari dagokionez, proiektuak hartu duen sendotasunaren ondorioz. Alegia, bost eremuetan sakontze lan handia egin dugu, gako urratsak oinarrizko behar psikologikoak asetzeko duten ahalmena arakatuz. Arakatze hau Maria Jose Lerak hasitako prozesu bat izan da eta ahalbidetu du zonaldetako mintegietan bide bera jorratzea. Zabaldu den bidearen ideia bat izan dezazuen, "Golden 5: luz para las aulas" liburuaren hitzaurre zati bat ekarri dugu hona

Formakuntza sakona izan da, beraz, eta hala baloratu dute mintegian parte hartu duten irakasleek ere. Partaideen ekarpen batzuk hona ekarri ditugu, Golden proiektua haratago doala islatzen dutelako:

Alderdi zabalak betetzen ditu Goldenek; eduki ugari eta aberatsak. Kontzientzia pizten lagundu digu, ondo egiten ari garena ikusi eta horretan sakondu eta zuzendu beharreko jarrerak era egokian, "konplexurik gabe" zuzentzen. Saio hauek arnasa eman digute indarberritu eta aurrera egiteko. Gizarte positiboa sortzeko oinarriak ezagutu ditugu eta, neurri batean, martxan jarri.

Bat egiten dugu pertzepzio horrekin proiektuan gabiltzan aholkulariok. Golden 5 zabaltzen eta sakontzen doa. Gizabanakoaren autodeterminazioa oinarri, heziketa praktika osoa hartzen du eta komunikatzeko, ikasteko, pentsatzeko, elkarrekin bizitzeko, ekimenerako eta izaten ikasteko bide bikaina dela uste dugu. Eta, jakina, ikaslearen zehar-konpetentzia guztiak garatzen dituenez, ez dago esan beharrik diziplina barruko konpetentzietan ere sekulako eragina duela.

Horregatik, eskola eta gizartea hobetzeko bide horretan sakonduz, honako gaiak ekarriko dizkigu datorren ikasturterako antolatzen ari garen prestakuntzak:

1. 2016-17 ikasturtean ikastetxeetan egin den ikerketaren emaitza, indarguneak azpimarratuz eta hobetzeko esku-hartzeak proiektatuz. Ondorioz, Golden 5aren sistematizazioa (ikerketan lehenetsitako gakoen baitan) ikasgelaren programazioan integratuta.
2. Golden 5 ikasgelan inplementazioaren adierazleak, “CLASS: Classroom Assessment Scoring System” tresnaren bidez.
3. Golden estrategiak Tutoretza Planean.

Oinarria, beti ere, gizakiaren hiru oinarrizko behar psikologikoak (gaitasun-ustea, harremanak eta autonomia) asetzea delarik eta jakinda hortik etorriko zaigula ikastetxeetan behar dugun bakea eta giro ona.

"Gauza berriak gertatzea nahi baduzu, ez ezazu betikoa egin"

Fisika kuantikoaren oinarrizko printzipioa

Binaka arrazoitzen: matematika baino gehiago

Datorren ikasturteko prestakuntza diseinatzen ari gara eta orain arte izan ditugun prozesuak aztertu ditugu, ea proposamen berriak egin behar diren edo lehengo prozesuetan zer aldatu behar dugun erabakitzeko. Hori horrela, 2016-17 ikasturtean hasitako Binaka arrazoitzen mintegiaren balorazio oso ona egin dugu eta interesgarria iruditu zaigu informazioa zabaltzea.

Tutorea eta tutoratua problemak ebazten elkarrekin - irudiaren jabea: ARA CRIATURES

Bartzelonako UAB-ko GRAI (Grup de Reserca sobre Aprenentatge entre Iguals) taldearen eskutik jaso genuen iaz "Binaka arrazoitzen" programaren berri. Marta Flores Coll irakaslea gonbidatu genuen eta zuzenean aurkeztu zigun. Ondoren, ikastetxe batzuk berdinen arteko tutoretzan eta matematika arloan sakontzera animatu ziren eta aurrera jo genuen.

2016-17 ikasturtean programa garatzen eta aplikatzen jardun dugu Lehen Hezkuntzako eta Bigarren Hezkuntzako hainbat irakasleekin batera eta bukaeran egindako balorazioetako batzuk ekarri ditugu hona:

Programa oso egituratuta dago. Dena bideratuta dago, horrek errazten du lana eta programaren martxa. Problemak ebazteko beste modu erakargarri bat ikastetxean ezartzeko, ikasleek gustura hartzen dutena. Oso interesgarria ikaskuntza kooperatiboan aurreratzeko. Gogoeta sakona problemen ebazpenaren inguruan; planifikazioa gai bereizgarri gisara. Problemen ebazpenean berrikuntza; interakzio egituratu eta planifikazioa indartzen du. Matematika lantzeko era berri bat.

Horrekin batera, mintegia eraman dugun aholkulariok arazo-egoeren bidez irakasteko bidea ere badela ikusi dugu, gaitasun anitzak abiarazten dituelako, planteatzen dituen jarduerak erronka txiki batzuk direlako eta, gehienetan, ebazpena irekia dutelako. Era berean esan dezakegu, Matematikarako konpetentziaz gain, Konpetentzia sozial eta zibikoa garatzen duela eta, zehar-konpetentziak diren Ikasteko eta pentsatzeko konpetentzia, Ekimenerako konpetentzia eta Elkarbizitzarako konpetentzia ere. Eta ez alboko ondorio gisara, intentzionalitate betearekin baizik. Horretarako izan baita diseinatuta.

Laburbilduz, programa aberatsa da eta oso ondo garatu ditu bi osagai nagusiak:
1. berdinen arteko tutoretza egituratua
2. eta problemen ebazpena arrazoitua lantzeko aproposak diren materialak.

Berdinen arteko tutoretzaz luze aritzea ez da behar, urte asko daramatzagu-eta gure ikastetxeetan praktikan jartzen, baina interesgarriak dira oraingo bertsio honek ekartzen dizkigun berrikuntzak. Bigarren osagaiari dagokionean, berriz, lan handia egin dugu aurten: katalanez eta gaztelaniaz zeuden materialak euskarara itzuli, gure egoeretara egokitu eta jarduera berriak sortu. Eta lan horri esker, datorren ikasturteko mintegian parte hartuko duten ikastetxeek behar duten guztia hasieratik eskura izatea bermatu ahal izango dugu.

Informazio gehiago nahi duenarentzat, hara hemen:

1. Cuadernos de pedagogia aldizkariak argitaratu artikulua:
   Razonar en pareja (Cuadernos de pedagogia)
2. Razonar en pareja liburuaren laburpena:
   Razonar en pareja: resumen del libro
3. Ikasleak binaka aritzeko interakzio pauta:
   Interakzio pauta
4. Ebaluaziorako material batzuk:
   Bikotearen autoebaluazioa
   Irakaslearen behaketa erregistroa
   Errubrika berritua
5. Ikasleek erabiltzeko jarduera orri bat adibide:
   LH_3Z_Jarduera4_Irteera egunean euria egiten badu

Beraz, Binaka arrazoitzen ezagutu eta praktikan jarri nahi baduzue, atsegin handiz hartuko zaituztegu 2017-18 ikasturtean egingo dugun mintegian.

Sexualitatea eta afektibitatea ezgaitasun intelektuala duten pertsonengan

Donostiako Berritzegunean ikastaro honen lehenengo saioari hasera eman diogu aste honetan. Hizlaria, EHUko Psikologia Fakultateko irakaslea den JAVIER GOMEZ-ZAPIAINekin.
Bigarren saioa urtarrilaren 26an izango dugu

ZER DA SEXUALITATEA? Gure izatea bera da, bere osotasunean.
MERLEAU-PONTY 1975

Sozialki, Hezkuntza eta Osasun esparruak hartzen baditugu, Sexualitatearekiko hurbilketa, gaur gaurkoz oraindik ere, BELDURRAren bidez egiten da. 

Garapen psikosexualaren eredu biografiko batetik abiatuta OSASUN alorretik nola esku-hartu jakiteko proposamenak jaso ditugu.

Informazioa osatzeko:

UHIN BARE http://www.sc.ehu.es/ptwgozaj/ubberri/

SEXU MUXU http://www.uhinbare.com/index.php/eu/

Donostiako Berritzegunea ere Donostiapedian

Donostiapedia liburua,  auzolanean idatzitako Donostiako liburua, osatu berri da Donostia 2016ren baitan. Abenduaren 15ean egin zen bere aurkezpen ofiziala, Easo kaleko egoitzan.  Parte hartu duten herritar guztiei euren lana eskertzeko antolatutako ekitaldian Donostiako Berritzegunea ere han izan ginen beste 35 partaideekin batera.

Donostiapedia liburuak, Donostiari buruzko ezagutza bildu, Euskal Wikipedia indartu eta hiriari buruzko informazioa handitu, zabaldu eta modu errazean eskuragarri jartzea lortu nahi izan du. Horregatik sustatu dugu Berritzegune honetatik ere, gure hiriko irakaskuntza ageriko egin nahi dugulako, hain zuzen ere.

Bide urratzaile izan nahi dugu, beraz,  baliabide interesgarri honetan parte hartuz; bide batez, beste eragileak ere horretara animatu nahi ditugu, gure eskolek asko baitute kontatzeko bere proiektuez: Nor diren, Ikastetxearen helburuak eta eskaintza, ibilbidea, aurreko partaideak eta egungoak, instalakuntzak, aisialdia, anekdota-bilduma…

Oraingoan Donostiako Berritzegunea eta Donostiapedia eskutik hartuta aritu diren bezala, etorkizunean Donostiako eragileekin, eta bereziki Hezkuntzakoekin,  bidea elkarrekin egiten jarraitu nahiko genuke. Hala bedi!

Gorputz Hezkuntza ezgaitasuna duten ikasleentzat, ikuspegi inklusibotik begiratuta-2.saioa

XABIER LEIZEA- KIROLENEko irakaslea  eta GAITUZ SPORT programaren arduradunak eskeini digu  2.saioa abenduaren 2ean.

Saio honetan kontzeptuak argitu ditugu:

 URRITASUNA- egitura edo funtzio psikologiko, fisiologiko edo anatomikoaren galera edot kaltea.

EZGAITASUNA-gaitasunen murrizketa edo ausentzia urritasun batek sortarazten duenean, normaltzat hartzen den gauza bat egiteko.

ELBARRITASUNA-MINUSBALIOTASUNA- urritasun edo ezgaitasunun baten ondorioz, pertsonak duen desabantailezko egoera eta honen ondorioz bere kasuan normalak diren jarduerak edo ekintzak mugatzen edo eragozten duenean.

Bestalde, argi geratu da, irakaskuntzan jarduten dugunok, ezgaitasun eta minusbaliotasunak eta baita hauek sortzen dituzten desabantaila sozialak ekiditen laguntzeko eragileak garela,

Horretarako PRESENTZIA -PARTEHARTZEA-GARAPENA BERMATU behar dira,  Eskola Marko Inklusiboan.

Formakuntza saio hauek jarraipena izango dute 2017ko urtarrilaren 16tik  aurrera, Eskola Marko Inklusiboaren baitan programaketak nola garatu ikusteko.

INFORMAZIO gehiagorako begiratu BERRITZEGUNEko WEBean prestakuntza-ekintzen atala(http://g01.berritzeguneak.net/eu/)

Euskararen Nazioarteko Eguna berritzegunean

“Zer egin dezaket nik euskararen alde?”  zioen aurtengo leloak, instituzio eta eragileek elkarlanean prestatutako  agiriaren goiburuak eta Donostiako Berritzeguneak bat egin du bertan agertzen den asmoarekin, gure aletxoa jarri nahian, sinetsirik askoren aletxoak batuta pila handia egiten dutela. Asmo horrekin ospatu dugu Euskararen Nazioarteko Eguna aurten ere.

Ekitaldiari hasiera eman diogu giro onean, kantuan, tartean joan berri zaigun Imanol Urbieta musikari eta pedagogo handiaren “Behin betiko” abestuz. Eta gure ereserkiak dioen moduan, “Har ditzagun eskuan… ildo ta programak… berrikuntzaz janzteko… BGko zelaia”ri helduz, gure baitako asmoak idatzi ditugu haizeak eragingo dien haize kolorez beteriko errotatxoetan, aire-aire euskarari! 

 

Elkarri laguntzeko joera dugunez, jarraian euskal kulturarekiko gure jakintza astindu dugu “Elkarri lagunduz” jokoaren bidez, era guztietako galderentzako erantzunak, baliabide digitalak erabiliz,  taldean bilatu nahian. Zerbait gehiago ikasi dugu gure idazle, margolari, plaza, eskultura, eraikuntza, bertso, esamolde, hizkuntza baliabideez…  Eta ohartu zenbat gehiago daukagun ikasteko gure kultura ez ezik, gure hizkuntzan ere hobeto bizitzeko urtean 365 egunetan.

VII Jardunaldi pedagogikoa Kale Dor Kayiko: Eskola-absentismoa gainditzeko gakoak

Azaroaren 28an Kale dor Kayikók antolaturiko VII Jardunaldi Pedagogikoa ospatu genuen Donostiako Berritzegunean, aurtengo leloa Eskola- absentismoa gainditzeko gakoak delarik.

Marko legalaren aurkezpenarekin hasi ginen: Hezkuntzaren derrigortasuna, hezkuntza eskubide unibertsala bezala eta hortik Pedro Carnicero ikuskariak Eskola-Absentismoaren aurka aritzeko erakunde desberdinetatik garatzen diren prozesuetaz hitzegin zuen.

Donostiako Berritzegunearen izenean Lui García Gurrutxaga aritu zen gero.

Gure berritzeguneak aurkeztutako gaia Eskola Arrakasta guztiontzat izan zen, ekitatea bermatzeko eta inklusioarako dauden oztopoak gainditzeko gakoak edo giltzarriak.

Bilboko Pio Baroja ikastetxeak aurkeztu zigun esperientzia inspiratzailea izan zen, Ikasketa Buruak mezu oso positiboa luzatu zigun: ikasleengan itxaropen altuak izan behar ditugula, familiak gureganatu behar ditugula, ditugun baliabideak era eraginkorrean erabili behar ditugula eta batez ere jarrera derrotistek porrota sortarazten dituztela.

Kale dor Kayikoko hezitzailea den Ainara Pinak ere familiekin lana egiteko , berdinen arteko elkarekintzan abiapuntutzat harturik, ideiak ere eman zizkigun

Bukatzeko ikasleen eta familien bizipenak ere bideo baten bidez entzuteko aukera izan genuen.

Bukatzeko gure Donostiako Berritzegunearentzat hezkuntza eragile desberdinekin: elkarte, ikasle, familia, irakasle, beste erakundeekin elkarlanean jardutea helburu estreategikoa dela esan beharra dago.

Beraz denoi zorionak!!  

Gorputz Hezkuntza ezgaitasuna duten ikasleentzat, ikuspegi inklusibotik begiratuta

XABIER LEIZEA- KIROLENEko irakaslea  eta GAITUZ SPORT programaren arduradunak eskeini digu  saioa urriaren 21ean. Bertaratu direnen artean, Gorputz Hezkuntzako espezialistez gain, Okupazio terapeuta,Fisioterapeutak, Tutore, PT eta HLEak ere izan dira. Elkarrekin aztertu dugu eskola INKLUSIBOAk zer eskaini behar duen, eta nola egituratu behar den GHko arloa; metodologia oinarrietatik abiatuta , antolamendu eta jarduera konkretuetaraino.  

 

Datorren saioa abenduaren 2an 10:00etatik -12:00etara

Ikastaro honek jarraipeneko  bigarren atala izango du urtarrilean: eskola marko inklusiboaren baitan programaketak nola garatu ikusteko. 

INFORMAZIO gehiagorako begiratu BERRITZEGUNEko WEBean prestakuntza-ekintzen atala (http://g01.berritzeguneak.net/eu/)

Golden 5: Gure ikasleek distira egin dezaten

"Zure umeak distira egin dezan" izenburuarekin argitaratu zuen Argiak 2014ko uztailean artikulu zabala eta ondo ekarria Golden 5 programari buruz. Hik Hasi aldizkariak ere sakon jardun zuen gaiaz 2015eko martxoan. Eta handik gutxira, Convives-ek ekarri zuen argitara programa eta programaren inguruko hainbat informazio.

ARTIKULUAK PDF FORMATUAN Argia:  Zure umeak distira egin dezan Hik Hasi: Ikasle bakoitzaren onena ateratzea xede Convives: Programa Golden: Una mirada positiva al desarrollo del alumnado

Euskal Herrian argitaratu ziren bietan aipatzen zen 40 inguru ikastetxeek hartu zutela parte Golden 5 programaren hasierako urtean, eta 86 hurrengoan. Une honetan, 2016-17 ikasturtean, 120 ikastetxe baino gehiago dabiltza Gipuzkoako berritzeguneek antolatzen ditugun mintegi eta lurraldeko saioetan. Sekulako arrakasta.

Baina arrakasta ez da zenbat ikastetxe ari diren programa bat aplikatzen. Arrakasta da Gipuzkoako hainbat eskoletako ehunka irakasle, egunero, ikasgelara sartzen direla euren ikasleek distira egin dezaten helburuarekin. Zertan oinarritzen dute beren asmoa? Nola lortzen da hori?

Golden 5 bi teoria nagusitan oinarritzen da: batetik, espektatiben teorian eta, bestetik, atribuzioen teorian. Espektatiben teoria, Pigmalion efektua ere deitzen zaiona, 1978an Roseenthal-ek garatutako teoria da. Haren esanetan, irakasle batek ikasle batenganako espektatiba altuak baditu, ikasle horrek emaitza hobeak lortuko ditu. Teoria horren funtsean dagoen oinarria “pentsatzen duguna ikusten dugula” da. Heiderren atribuzioen teoria ere aspalditxokoa da, 1958koa hain zuzen, eta hainbat esparrutan erabili bada ere, ez du hezkuntzan aplikazio handirik izan. Labur esanda, atribuzioak partekatzen ditugunean gure arteko harremana estutzen denez, askotan egiten dugu konturatu gabe. Irakasleen artean ere berdin gertatzen da eta batek besteari ikaslearen inguruan atribuzio negatiboa egiten badio, besteak inkontzienteki indartzeko joera izango du, beraz, espektatiba negatiboak zabalduko dira. Aldiz, ikaslearen gaineko atribuzio positiboak partekatzen badira, ikasle horren alderdi positiboak hartuko du indarra eta ikaslea bera loratzen joango da.

Ondorengo bideoan azaltzen du espektatiba eta atribuzioen gaia Maria Jose Lerak, Golden 5 programaren egileetako bat

Ikaslea begirada positiboan jartzea eskatzen dio Golden 5ek irakasleari, baina, proiektua martxan jartzeko, horrekin ez da nahikoa. Programa egituratu, sistematizatu eta estrategia zehatzak markatu behar dira, irakasleek eguneroko jardunean aldaketak txertatuz joan daitezen. Horregatik, Golden 5 programa bost eremu nagusik osatzen dute. Funtsean dagoen ideia zera da: arlo horietako bakoitzean arreta jarriz, irakaslearen jardun osoa hobetuko da. Eta ondorioz, ikasle guztien eskola arrakasta nabarmen handituko da. Aurkezpen honetan azaltzen dira gakoak:

Asko luzatuko ginateke Golden 5ek eskoletako harremanetan eragiteko duen ahalmena azaldu nahi bagenu blog sarrera batean. Batetik, planteamendu oso garatua eta zehaztua duelako eta, bestetik, eten gabe garatzen ari delako, bai irakasleen praktikak programari egiten dizkion ekarpenekin, baita egileak egiten ari diren sakontzeko lanari esker ere. Sakontze lan horren emaitza, Maria Jose Lerak idatzi duen eta laster argitaratuko den liburua, programa bera eta jasotako esperientziak azaltzeaz gain, gizakia ulertzeko teorien ikuspuntu landua eta oso baliagarria ematen duena. Gure ikasleek guztiek distira egin dezaten eta, ondorioz, irakasleen bikaintasuna eta gizartearen harmonia handiago izan dadin.

GEHIAGO JAKITEKO

- Golden 5 erakundearen webgunea - Donostiako Golden 5aren moodlea

Badugu kulturaniztasuna. Ba al dugu kulturartekotasuna?

Amelia Barquin izan dugu gurekin Donostiako Berritzegunean, “Kulturartekotasuna eta hizkuntzak indartzea” ikastaroaren barruan. Gaia, Kulturartekotasuna ikastetxean: indarguneak, dilemak eta erronkak.

Ertz askotako gaia da eta -hizkuntzaren ikuspegitik garatzeko ekarri badugu ere- aukera izan dugu elkarbizitzaz, errespetuaz, eskolaren zereginaz, kontsumismoaz, pobreziaz, identitateaz, generoaz... eta beste hainbat gaiez jarduteko. Gai mardulak denak, Barquinek berak dioen moduan, “temazoak”.

Leun mintzatzen da Amelia Barquin. Batzuetan xuxurlatu besterik ez, esaten duena barru barrutik aterako balitzaio bezala. Eta emeki azaldu dizkigu hausnarketa sakon batean sortutako galderak eta gogoetak, gure artean presente eginaz ikastetxeetan ditugun ikasle “diferente” guztiak, ikasle guztiak baitira diferente. Saiora ekarritako "besteek" izena dute: Rachid, Aixa, Samira... Izena dute Amelia Barquinen bizitzan ere izena dutelako. Eta horrek egiten ditu benetakoagoak entzun dizkiogun hauek bezalako pentsamenduak:
     "Etorkinak dauzkaten eskolak eta gelak hobeak dira besteak baino?"
     "Etorkinen seme-alabarik gabeko eskolek ez dute ondo prestatzen bizitzeko."
     "Noiz uzten diote etorkinen seme-alabek etorkinak izateari"
     "Bere habia egiteko lastoaren bila dabilen neskarekin... erantzukizuna daukagu"

Zer pentsatu ematen dute entzundakoak, baina ez da entzunaldia eta barruko gogoeta soilik izan, geuk ere aukera izan dugu eskoletan ditugun esperientziak azaltzeko eta ditugun kezkak partekatzeko, une askotan elkarrizketa bilakatu den ikastaro saioan.

Lau orduko emanaldia motza egin zaigu eta gehiago sakontzeko gogoz geratu gara, munduan dugun erronka handienetakoa baita etorkinen eta migrazioen gaia eta, era berean, aukera paregabea barruan ditugun aurreiritzi inkontzienteekin lan egiteko.

Ondorengo bideoan ikus dezakezue azalpenaren zati bat, saioaren tonua nola izan den ikusteko aukera ematen duena.

Amelia Barquinek idatzitako artikuluak eta kulturartekotasunaren gaian egindako ekarpenak ezagutzeko, interesgarriak dira ondorengo helbideak:
Kinka (bere bloga)
Amelia Barquin irakaslea
Argitalpenak

Datorren azaroaren 25ean Emakumeen kontrako indarkeriaren aurkako eguna ospatzen da

Azaroaren 25a, Emakumeen kontrako indarkeriaren aurkako Nazioarteko Eguna badatorrela eta, hemen duzue emakumeen kontrako indarkeriaren aurkako sinboloa deskargatzeko aukera, puntu lila (sakatu hemen irudia deskargatzeko). Sinbolo hau publikoki erakusteak berarekin dakar emakume eta gizonen arteko berdintasun eza oinarri duen era honetako indarkeriaren kontrako konpromiso aktiboa. Hilabete honetan zehar honen erabilera egin dezazuen eskatzen dizuegu, irudi hau publikoa egitea zuen mezuetan, zuen webguneetan, sare sozialetan, egoitzetan, eskutitzetan, eta bururatzen zaizuen leku guztietan.

                                                  

Con motivo del próximo 25 de noviembre, Día Internacional contra la Violencia hacia las Mujeres, ponemos a vuestra diposición la imagen del punto lila, símbolo del rechazo a la violencia contra las mujeres (podéis descargar la imagen aquí). Mostrar este símbolo públicamente implica un compromiso activo contra este tipo de violencia cuyo origen se encuentra en la desigualdad entre mujeres y hombres. Os pedimos que durante este mes hagáis uso del punto lila, mostrándolo, por ejemplo, en los pies de firma de vuestros correos, en vuestras cartas, en vuestras instalaciones, en vuestra web, en las redes sociales y en los lugares que consideréis oportuno.  

IKASTETXEETAN IKASLE, IRAKASLE ETA FAMILIEKIN LANTZEKO PROPOSAMENAK

BIOLENTZIA NON KOMUNITATEA HAN

LA COMUNIDAD CONTRA LA VIOLENCIA

"Kulturartekotasuna eta hizkuntzak indartzea" ikastaroa: 1. eta 2. saioak

Aurten ere ikastetxeei esaten zaie “ikasle etorkinentzako hezkuntza-arretarako plana: kulturarteko proiektua eta hizkuntza indartzeko proiektua (2012-2015)” ikastetxeko urteko planean zehaztuta agertu behar dutela (ikusi “ildo estrategikoen eta lanabesen laburpen taula, I eranskina, 16-17 ikasturtea antolatzeko hasierako ebazpenean).

Honek esan nahi du zehaztutako planaren arabera gai honekiko estrategiak nahiz jarduerak zabaldu behar direla urtean zehar. Hauetako batzuk hizkuntza indartzeko irakaslearenak –ikastetxean irakasle honek zer funtzio bete behar dituen eta hau garatzen hasteko zer baliabide dituen - gertatzen dira. Beraz aldez aurretik hau guztia zehaztua badago hobeto.

Honetaz hitz egin zen pasa zen urriaren 19an noiz eman baitzen “kulturartekotasuna eta hizkuntzak indartzea” delako ikastaroaren 1. saioa.

Hurrengo saioei begiratuta 1. saio horretatik ondorioztatzen diren hainbat gai aipatzeko modukoak lirateke. Hona hemen batzuk:

1,.Talde bereziak ala ez egitea (noiz, non,…)

2.-Hizkuntzen antzekotasuna (hizkuntza erromanikoak,…)

3.-Ama hizkuntzaren garrantzia (oinarrizko ezagupenak,…autoestima,…)

4.-Familiaren eragina (giroa, senideen artekoaren garrantzia,…)

5.-Testuinguru soziolingüistikoaren eragina (esperientzia,…)

6.-Eskolako partaide antzekoak (ikasleen jatorria,…)

7.-Eskolaren plana (kulturarteko plangintza, hizkuntzena,..)

8.-Ebaluazioa (ikaslearen errealitatea,…)

9.-Hizkuntzen trataera integratzailea (bateratua,…)

10.-Eleaniztasun ideia (kontzeptua, tresnak,…)

11.-Autoestimaren garrantzia (tutoretza,….)

12.-Hizkuntza orokorraren prozesuak (entzumena,…)

………………………………………….

2. saioan, eta kulturarteko esparruaz hitz egiteko gonbidatu bat izango dugu, hain zuzen ere HUHEZI-Mondragon Unibertsitateko irakaslea den Amelia Barquín. Unibertsitateko "Berrikuntza eta esku-hartzea testuinguru kulturanitz eta eleanitzetan" delako departamentuan lan egiten du. Kasu honetan 2. saio hau irekita izango da eta tratatutako gaia honako hau izango da:

“Kulturartekotasuna ikastetxean: indarguneak, dilemak eta erronkak”

Nahi izanez gero saioan parte hartzeko eta izen-ematea egiteko esteka hau eskura duzu: 

http://g01.berritzeguneak.net/eu/actividades_detalle.php?codigo=1670G01C08

Bestaldetik Amelia Barquinen bloga ezagutzeak emango liguke aukera gaurko egunetan gai hauen presentzia izateko.

Jakintza Ikastola auzoko bizitza hobetzen

Proiektu ederra egin dute Jakintza Ikastolan eskola eta auzoaren arteko erlazioa sustatzeko. Jakintza Ikastola (ikasleak, irakasleak, langileak eta gurasoak), Tabakalerako hezkuntza taldea eta Antiguako auzokideen arteko elkarlanaren bidez garatu dute.

Tabakalerako kultur proiektuen prozesuan kokatzen da ekimena. Hezkuntza komunitate eta Elkarteekin programan, hain zuzen ere. Azken urteetan “Haurren Hiria” bezalako esperientziei esker, hirigintza, hiritarren parte hartzea, eskola eta hezkuntza kontzeptuak modu zabalago batean ulertzen dira eta espazio publikoa, hezkuntza proiektuak garatzeko testuinguru eta lanerako espazio bilakatu da, eraldaketa sozialerako aukerak eskainiz.

Jakintzako ikasleak beren gustuko txokoak planoan adierazten   cc-by-sa Tabakalera

Abiapuntua honako hau izan da:
Nolakoak dira gure eskolako eta inguruko espazio publikoak? Nola eraldatu eskola eta auzoaren arteko erlazioa? Helburua, hiria, hezkuntza eta praktika kolaboratiboak bultzatzea eskolako espazioetan eta auzoan.

Eta lehenengo deialdi honetan Jakintza Ikastolak aurkeztutako proiektua izan da aukeratua. Egitasmoa Erregezain eta Heriz kaleak lotzen dituen pasabidea biziberritzearen desiotik sortzen da. Toki berezia da, bai ikastolako ikasleek eta bai bizilagunek erabiltzen dutelako. Leku atseginagoa bihurtzeko helburuarekin, gustuko dituzten auzoko toki batzuk esploratzen aritu dira, pasabiderako proposamenak eta ideiak jasotzeko. Ondoren, eraldaketa denon artean diseinatu eta garatu dute kultur-trukerako espazio bat sortuz.

Horrekin guztiarekin, auzoa eta eskolaren arteko harremanak estutu nahi dituzte, eskola auzora ateraz eta auzoko txoko batzuk “eskola” bihurtuz. Ikastolatik auzora! Pasabide berriaren irekiera ekainaren 3an izango da, arratsaldeko 17:00etan

Jarraian,  ikus eta entzun dezakezue protagonistek beraiek kontatutakoa.


Jakintza Ikastola: Hiria, hezkuntza eta praktika kolaboratiboak from Tabakalera on Vimeo.

Maiatzak 17: LGTBIQ-fobiaren aurkako eguna

ANIZTASUNA, ABERASTASUNA

LGTBIQ mugimenduari lotutako errebindikazioak egiteko bi data dauzkagu:

1-    Maiatzak 17, LGTBIQ fobiaren kontrako eguna

Osasunaren Munduko Erakundeak (OME), 1990eko maiatzaren 17an hain zuzen ere, homosexualitatea eta transexualitatea gaixotasun mentalen ataletik kendu zituen, zientziari eta arrazoiari aurre eginez gizartean zeuden aurreiritzi historikoak gaindituz.

2-    Ekainak 28, LGTB harrotasun eguna.

LGBT taldeek publikoki ospakizunak egiten dituzte errespetu eta berdintasunaren aldeko aldarrikapenak egiteko. Data hori aukeratu zuten 1969ko ekainaren 28an, Stonewall-en (New York) suertatu ziren istiluak gogoratzeko eta homosexualen liberazio mugimenduaren hastapen bezala hartzen direnak .

Gure kasuan, ikastetxetan,  egun bi horien errebindikazioak egun berean lantzen eta ospatzen ditugu, Maiatzak 17an hain zuzen,  eskola   egutegiak aukera hori ematen duelako.

Maiatzak 17ko ospakizun hau egitea ezinbestekoa da; betidanik, gizarteak homosexualitatea, lesbianismoa, transexualitatea eta genero konportamentu ez normatiboak ez baititu onartu, are gehiago diskriminatu egin baitu. Gure inguruan azken hamarkadatan aurrerapauso itzela eman bada ere, esaterako, bisibilizazioan, onarpen mailan, eta lege-berdintasunean, oraindik benetako berdintasuna lortzeko bide luzea geratzen da: egun, zoritxarrez, bazterkeria, jazarpena, diskriminazioa jasaten dira. Bost ikasletik bik etengabe edo maiz entzuten dituzte "lesbi", "marikoia", "marimutila" eta halako irainak;  LGTB diren edo itxuragatik LGTBtzat hartzen direnen aurkako bazterkeriaren lekuko izan da % 46,8 ikasle; eta hamarretik ia lauk entzun ditu noizbait kolektibo horren aurkako mehatxuak edo gorrotozko hitzak.

Hezkuntza Sistemak aldaketarako eragile aktiboa izan behar du: ikastetxeen giroa zaintzen, gaiari bere osotasunean heltzen. Neska-mutilek ezin dute euren identitatea deskubritu irainen bitartez.  Erreferente ugari behar dituzte euren identitateak joateko eraikitzen era positiboan eta askatasun handiagorekin. Nahiz eta  LGTBIQ  bisibilizazioa gero eta handiagoa izan gure inguruan eta familia eredu anitza gure ikastetxeetan egon, oraindik hainbat esparrutan ez zaie kontuan hartzen, beraz,  ikastetxeek euren  aldeko jarrera agerian utzi behar dute eta behar diren esku-hartzeak martxan jarri.

Ikastetxeetan hau dena lantzeko proposamenak prestatu ditugu etapa eta maila desberdinetan garatzeko hurrengo helburuekin

https://www.dropbox.com/sh/cn1dao2a8ygoog4/AACOlP9XVq531eFjlsz7pUcta?dl=0

 HELBURUAK

·         Maiatzaren 17an eta Ekainaren 28an zer ospatzen den ezagutzea.

·         LGTBIQ pertsonen aurreko jarrera positiboa bultzatzea.

·         Curriculumean Historian zehar izandako LGTBIQ pertsonak ikustaraztea   eta erreferenteak  izateko aukera ematea.

·         Sexu-Genero  estereotipo normatiboz osatutako sistema apurtzea.

·         Familia aniztasuna ezagutu eta ikustaraztea.

Jardueren artean:

DBH 3. eta 4. mailetan eta BATXILERGOAN

PRIDE filmaren inguruko forum-a

DBH 1. eta 2. mailetan

 “Reacción de un niño frente a una pareja gay”, bideoa ikusi eta komentatu.

https://www.youtube.com/watch?v=mojRvwHmQ8U

Mapa interaktibo honetan ikusiko duzue munduan LGTB pertsonen eskubideen egoera :

https://www.google.com/maps/d/u/0/viewer?mid=znVIMbLmuRQ0.kxHWlkGkRbDg2011

LH 2. eta 3. zikloetan: FAMILIA ANIZTASUNA

   STICK AND STONES filma (Rainbow)

HH eta LH 1. zikloan: FAMILIA ANIZTASUNA

 PAPA`S BOY filma (Rainbow)

Hau dena eta gehiago eskuratzeko sar zaitez esteka honetan:

https://www.dropbox.com/sh/cn1dao2a8ygoog4/AACOlP9XVq531eFjlsz7pUcta?dl=0

Joan Vaello berriz gure artean. Harreman pertsonal-profesionalak irakasle eta familiekin

Joan den ostegunean, martxoaren 17an, Donostiako Berritzegunean formakuntza saio berri bat izan genuen Joan Vaellorekin. Oraingoan  lehen hezkuntzako eta bigarren hezkuntzako zuzendaritza taldeko kideekin batera orientatzaileak eta Berritzeguneko aholkulariak ere bertaratu ziren.
Urtarrilean ere gurekin izan genuen Pertsonak eta gatazkak kudeatzen ikastetxean izenburupean . Oraingoan Harreman pertsonal-profesionalak irakasle eta familiekin gaia landu genuen.

Berak esandakotik eta sortu zen solasetik jasotako ideaia batzuk :

• Economia: edozein plan edo proiektu aurrera eramateko beti errezenak eta sinpleenak aukeratu.
• Anticiparse: arazoak aurreikusi, sarritan errepikatzen bait dira.
• Actitudes:

                     -Proactiva : zer egin dezaket egoera hobetzeko.
                     - Reactiva externa: etengabeko kexak besteek egiten dutenari buruz ( ikasleak ez dute                            egiten, familiek, administrazioak....)

Azken batean kexak eta kulpak alde batera utzi eta konpromisoak eta irtenbideak bilatzen dituen kultura bultzatu.

Lau Ren dinamika ere aipatu zuen beste batzuen artean:

• Resentimiento:norbaitek ezinegona, kexua badauka utzi egin behar zaio adierazten.Kanpokoek eragindako fasea.
• Reconocimiento:zer uste duzu zuk egin duzula, esan duzula..... onarpen fasea.
• Requerimientos: eskakizun fasea, nik eskatuko nizuke.....
• Ratificaciones: aurreko fasea onartuta, onarpen eta eskertze fasea. Benetan bete dadin ezinbestekoa jarraipena egitea.

Pertsonak eta gatazkak kudeatzen ikastetxeetan

Urtarrilak 14an gure artean Donostiako Berritzegunean Joan Vaello Orts izan genuen. Zuzendarien Mintegia eta Orientazio mintegia bat eginik, lehen hezkuntzako eta bigarren hezkuntzako zuzendaritza taldeak eta orientatzaileak bildu genituen Berritzeguneko aholkulariekin batera. Zuzendaritzatik pertsonak eta gatazkak nola kudeatu izenburupean antolatu genuen saioan.

Aurkezpena hiru zutabetan oinarritu zuen:

• Ikastetxeko planen garapena
• Aldaketak bermatu behar ditu
• Erabakiorra
• Jasangarria
• Praktikoa
• Indartsua
• Barne-proaktiboa
• Taldeen kudeaketa
• (SD) Dikeen sistema
• Pertsonekin lan egin
• Dikeen sistema eta funtzioak.

Hemen eskuratu dezakezue hizlariak erabili zuen power pointa:

Golden 5 Norvegiatik Gipuzkoara

Saio interesgarria izan genuen atzo Golden 5-eko autore Knud Jensen-en eta Frode Jøsan-en eskutik. Norvegiako Stanvanger-eko Hezkuntza premia bereziko irakasleak eta orientatzaileak dira Jensen eta Jøsan. Biak ala biak eskarmentu handiko adituak bertako eskoletan laguntza emateko jardunean.

Atzokoa 2015-16 ikasturteko Golden 5 programaren mintegiaren edukia zen. Gipuzkoako berritzeguneetan egiten ari garen mintegietako saio orokor bat, goiz eta arratsalderako programatutakoa. Hasieran, aurtengo plangintza egin genuenean, María José Lerak eramango zuen saioa, baina aukera paregabea izan genuen Golden 5-aren aitzindariak zuzenean entzuteko eta, Donostiako Karlos Santamarian, izan genituen gurekin.

Goizean, Jøsan-ek eraman zuen azalpenaren haria eta Ikaskuntza doituaren inguruan hitz egin zigun, beti ere Stavanger-eko euren orientazio zerbitzuan egiten dutenaren arabera. Horregatik, Norvegiako hezkuntza sistemaz jakiteko aukera izan genuen ere, lanean erabiltzen dituzten datuak eskaini baitzitzaizkigun.

Lera, Jøsan eta Jensen soziograma azaltzen       cc-by-sa Donostiako Berritzegunea

Goizeko azken zatian Jensen-ek hartu zion txanda eta berak jarraitu zuen arratsaldean ere. Gelaren kudeaketa zen gaia eta ikaskuntzarako giro egokiaren zortzi faktoreetan jarri zuen indarra. Hala nola, luze jardun zuen segurtasunaz, irekitasunaz, bermeaz, argitasunaz, trebetasunez, elkarrekiko ainguratzeaz, taldean erabakitzeaz eta identitateaz.

Ikuspegi berezia eman ziguten Golden 5-en inguruan. Programa martxan duzuenok aurkituko zenituzten berdintasunak eta aldeak, baita gogoeta iradokitzaileak ere. Golden 5era beranduago etorritakoek, berriz, aztertzeko material ugaria.

Hitzaldien bideoak eta utzitako materialak aztertzeko aukera izango dugu laster berritzeguneetako mintegietan.

Azaroaren 25a

Azaroaren 25a, Emakumeen kontrako indarkeriaren aurkako Nazioarteko Eguna badatorrela eta, hemen duzue emakumeen kontrako indarkeriaren aurkako sinboloa deskargatzeko aukera, puntu lila (sakatu hemen irudia deskargatzeko). Sinbolo hau publikoki erakusteak berarekin dakar emakume eta gizonen arteko berdintasun eza oinarri duen era honetako indarkeriaren kontrako konpromiso aktiboa. Hilabete honetan zehar honen erabilera egin dezazuen eskatzen dizuegu, irudi hau publikoa egitea zuen mezuetan, zuen webguneetan, sare sozialetan, egoitzetan, eskutitzetan, eta bururatzen zaizuen leku guztietan.

Con motivo del próximo 25 de noviembre, Día Internacional contra la Violencia hacia las Mujeres, ponemos a vuestra disposición la imagen del punto lila, símbolo del rechazo a la violencia contra las mujeres (podéis descargar la imagen aquí). Mostrar este símbolo públicamente implica un compromiso activo contra este tipo de violencia cuyo origen se encuentra en la desigualdad entre mujeres y hombres. Os pedimos que durante este mes hagáis uso del punto lila, mostrándolo, por ejemplo,  en los pies de firma de vuestros correos, en vuestras cartas, en vuestras instalaciones, en vuestra web, en las redes sociales y en los lugares que consideréis oportuno.

Zuen ikastetxeetan nahi baduzue ikasleekin egun horretan gaia landu hemen duzue proposamen bat:

Ez ikusiarena ez egin

https://www.dropbox.com/s/16ldfnal0h0nmc8/Azaroak%2025_2015.pptx?dl=0

https://www.dropbox.com/s/tiolxbh6k6gtjy5/Azaroak_25.docx?dl=0

Animatu zaitezte!!!